O presidente do Parlamento trasladará á Mesa e á Xunta de Portavoces os feitos rexistrados esta mañá no Pleno

 
 
Santiago, 11 de abril de 2018.-  O presidente do Parlamento de Galicia, Miguel Ángel Santalices Vieira, tras consultar aos Servizos Xurídicos da Cámara, trasladará á Mesa e á Xunta de Portavoces do Parlamento os feitos protagonizados esta mañá polo deputado do BNG Luis Bará.
 
En todo caso, o Parlamento de Galicia recorda que os deputados e deputadas están obrigados a respectar a orde, a cortesía e a disciplina parlamentarias (artigo 13 RPG), obriga compatible coa liberdade de discurso dos membros da Cámara; que o artigo 105.1 contempla a chamada á orde cando na Cámara se vertan conceptos ofensivos ao decoro desta, dos seus membros, das institucións do Estado ou de Galicia ou de calquera outra persoa ou entidade; e que, por todo iso, a destrución da imaxe fotográfica do xefe do Estado é unha conduta digna de reproche en sede parlamentaria e impropia dun membro desta Cámara.
 
 
Saúdos, Gabinete de Comunicación.

Imaxes relacionadas