Parlamento de Galicia
Parlamento de Galicia
• Os menús serán elaborados no Centro Superior de Hostelería de Galicia utilizando produtos agrogandeiros galegos de proximidade e serán distribuídos a través de comedores sociais, cociñas económicas e outras entidades sociais
• A iniciativa contará cun orzamento de 65.000 euros, financiados polo Parlamento, a Vicepresidencia primeira e Consellería da Presidencia, e a Consellería de Medio Rural da Xunta de Galicia
• Os menús serán repartidos o 24 de decembro
Santiago, 16 de decembro de 2020.- O Parlamento de Galicia, a Xunta de Galicia e a ONG World Central Kitchen, impulsada polo coñecido chef José Andrés, elaborarán e distribuirán menús de nadal a familias e persoas en situación de vulnerabilidade agravada pola covid-19, segundo se desprende dun convenio asinado esta mañá no Centro Superior de Hostelería de Galicia.
En virtude deste convenio, cociñeiras e cociñeiros galegos de prestixio, xunto co chef José Andrés, prepararán, nas dependencias do Centro Superior de Hostelería de Galicia, menús de nadal elaborados con produtos agrogandeiros galegos e de proximidade, adquiridos directamente a agricultores, gandeiros e/ou industrias de transformación de Galicia.
A coordinación do proceso de elaboración dos menús e a súa distribución nos comedores sociais, cociñas económicas e outras entidades sociais que desenvolvan actividades análogas correrá a cargo da ONG World Central Kitchen. Os menús serán repartidos o día de noiteboa, 24 de decembro.
Provedores integrados en Mercaproximidade
A medida está orientada a que persoas e familias en situación de vulnerabilidade podan celebrar a noiteboa e o nadal, ao tempo que apoia a viabilidade dos produtores agrícolas e gandeiros de Galicia. A adquisición efectuarase a provedores integrados na canle de comercialización de produtos agrogandeiros galegos Mercaproximidade. O importe dos produtos adquiridos a cada provedor deberá ser inferior a 15.000 euros, na procura da pluralidade na prestación deste servizo.
Esta iniciativa será financiada cunha achega total de 65.000 euros, financiados polo Parlamento de Galicia, a Vicepresidencia primeira e Consellería da Presidencia, Xustiza e Turismo, e a Consellería de Medio Rural da Xunta de Galicia.
Compromiso social do Parlamento
O presidente do Parlamento de Galicia, Miguel Ángel Santalices Vieira, enmarcou este convenio no “compromiso social” da Cámara lexislativa galega, e que se traduce en diferentes medidas de apoio ás entidades e organizacións que operan neste ámbito. Recordou que a finais de novembro, Parlamento de Galicia e Consellería de Medio Rural asinaran outro documento de colaboración para achegar cadansúa partida de 65.000 euros para adquisición de produtos de proximidade para comedores sociais e bancos de alimentos.
O convenio de colaboración foi asinado polo presidente o Parlamento de Galicia, Miguel Ángel Santalices Vieira; o vicepresidente primeiro e conselleiro da Presidencia, Xustiza e Turismo, Alfonso Rueda Valenzuela; e o conselleiro de Medio Rural, José González Vázquez.
Saúdos, Gabinete de Comunicación.
