O Parlamento conta cun sistema de bucle magnético para mellorar a audición das persoas xordas

 

 

Santiago, 8 de decembro de 2021.- O Parlamento de Galicia acaba de instalar e verificar o correcto funcionamento dun sistema de bucle magnético destinado a mellorar a audición das persoas xordas que utilizan audiófonos ou implantes, que estará operativo a partir desta semana.

 

Tamén denominado bucle de indución magnética ou bucle de indución de audiofrecuencia, este sistema, con normalización internacional, reduce de maneira significativa o ruído de fondo que perciben as persoas usuarias de audiófonos ou implantes, mellorado deste xeito a intelixibilidade.

 

 

O sistema foi instalado na área de deputados e de público do salón de plenos do Parlamento, no Salón dos Reis e na sala de exposicións. Tamén se habilitou un equipo portátil (con emisor e receptores portátiles) destinado a prestar servizo ás visitas guiadas ou actividades programadas en áreas diferentes ás delimitadas co bucle magnético.

 

O equipamento técnico acompáñase dun símbolo de accesibilidade auditiva que identifica a dispoñibilidade deste sistema nos diferentes espazos do Pazo do Hórreo.

 

A instalación de bucle magnético súmase a outras medidas xa implantas polo Parlamento de Galicia como a instalación de pictogramas orientados a facilitar  a accesibilidade cognitiva das persoas con trastorno do espectro autista (TEA), a incorporación dun servizo de interpretación  de lingua de signos na emisión web das sesións do Pleno e da Deputación Permanente ou a convocatoria dun concurso –xa tramitado, pendente do próximo inicio das obras- para mellorar a accesibilidade do Pazo do Hórreo e suprimir barreiras arquitectónicas.

 

Todas estas medidas foron adoptadas  co asesoramento de entidades que operan no ámbito da diversidade funcional.

 

Saúdos, Gabinete de Comunicación.